pileuleuyan

Hayu geura saradiya, meungpeung keur hirup di dunya

Amal keur sampeureun tea, di akhir moal sulaya

Geuning maot ngadodoho, boro sok di poho-poho

Datangna teu mere nyaho, ngageretek teu aya tempo

Taya beurang taya peuting, taya raja taya kuring

Dimana ajal tos sumping, teu meunang tempo anaking

Horeng nyawa reujeung badan, nu geus lila babarengan

Datang mangsa pipisahan, paturay tineung amitan

Lain meureun lain sugan, da ieu mah kanyataan

Kabeh pasti ngarandapan, geuning awal urang pisan

Kaget reuwas mata mencrang, renghap ranjag menggah bengong

Nafas ngangseg na genggerong, nu deukeut geus katembong

Horeng ieu teh sakarat, dicabut ku malaikat

Nyawa ngangseg mapay urat, teu aya daya keur lumpat

Ku renghap nu panganggeusan, pegat sakabeh hareupan

Ngabeungkang taya dayaan, rek kumaha panghareupan

Boro mah keur suka bungah, ngatur napsu seuri bungah

Beak tempo kudu pindah, nyampeurkeun ka alam barzah

Geus waktu ninggalkeun lembur, meunuju ka alam kubur

Meunang ngali geus di ukur, mahi keur awak sakujur

Rek naon anu dibawa, duit tawa sawah lega

Meunang ngumpul-ngumpul tea, belaan nipu pasea

Meunang tisusruk tidungdung, nu sok dipake adigung

Kana sholat matak liwung, waktuna zakat mah embung

Ibadah kateler-teler, nepi ka nyanghulu ngaler

Lapur badan eunggeus kemper, di tengah imah ngagoler

Ngajolopong diruruban, diriung ditarungguan

Lagadar datang pasaran, montong lila sosonoan

Nu ngariung nyingkir miris, nyaah ge bati ngaleungis

Geumpeur pacampur jeung waas, setan mah bati mupuas.